Fri, 23 Aug 2019

Cebuano News: Paghikaw sa 20% PWD, SC discount buot mapatin-aw

Philippine Information Agency
14 Aug 2019, 22:38 GMT+10

TAGBILARAN CITY, Bohol, Aug. 1 (PIA)--Gitugotan ba ang usa ka kompanya sa panakyanan sa kadagatan nga dili na mohatag sa gimandu sa balaod nga diskwento alang sa mga may kabilinggan sa lawas (PWD) ug senior citizens (SC) tungod kay may nagpadayon sila'ng gitanyag nga promo?

Kini mao'y buot masayran sa mga PWD ug senior citizens kinsa nibati nga natikasan kay nagdumili ang usa ka kompanya sa panakyanan sa kadagatan sa ilang angayan nga makuha nga diskwento.

Segun sa mga PWDs didto sa binuksan nga kalihukan sa National Disability Prevention and Rehabilitation Week sa Hulyo, didto sa Activity Center sa Island City Mall, nga nagdumili ang OceanFast Ferries (OFF) sa paghatag sa 20% nga diskwento nga gimandu sa balaod.

Kini, matud pa, tungod sa rason nga may Libre Balik Promo nga nagpadayon ang kompanya nga napahimuslan na sa pagkuha sa ticket.

Gani, bisan wala na ang Libre Balik Promo, dihang gipangayo na usab ang nasugo sa balaod, giangkon na usab sa OFF nga naghatag gihapon sila sa lukop nga diskwento sa ilang pletehan nga P500.

Segun pa sa mga PWDs, dili obligado ang OFF nga mohatag sa promo, apan obligado ang OFF nga mohatag og kwentada sa ilang obligasyon nga mandu sa balaod alang sa sektor nga naalkanse na nga daan.

Bisan pa, may mga naniid nga mibutyag nga ang P500, kon may 20 porsyento na kini nga discount, mahimo nga kining ilang giangkon nga pletehan, dili maoy makit an nga gisanghid sa mga ahensya sa kagamhanan nga nagtugot sa ilang prangkisa.

Niini, nanghangyo ang mga sektor nga nahimong nahikawan sa mandu sa balaod, nga mapatin-awan sa nasampit nga kahimtang.

Hinuon, may wala pa makompirmar nga kasayuran nga nahipos, nga may kaso na nga gisang at sa korte aron kahatagan na og patin-aw kon sakto ba ang OFF sa ilang gibuhat sa paghikaw sa diskwento.

Wala pa usab hinuon dugang kasayuran kabahin sa kaugmaran sa gitaho nga kaso.

Samtang kini nagpadayon, nangandoy ang mga PWDs nga maresolbar na sa labing dali nga panahon ang ilang gipangayo nga pagpatin aw, sanglit kini dili lamang alang kanila, apan usab alang sa senior citizens. (rahc/PIA-7/Bohol)

More Manchester News

Access More

Sign up for Manchester News

a daily newsletter full of things to discuss over drinks.and the great thing is that it's on the house!